സൗദിയിൽ നിന്ന്​ യുവാവിന്റെ മൃതദേഹത്തിന്​ പകരമെത്തിയത്​​ ശ്രീലങ്കൻ യുവതിയുടേത്

പത്തനംതിട്ട: സൗദിയിൽ നിര്യാതനായ യുവാവി​​ന്റെതി​ന്​​ പകരം നാട്ടിലെത്തിച്ചത്​ യുവതിയുടെ മൃതദേഹം. വീട്ടിൽ കൊണ്ടുവന്ന്​ പെട്ടി തുറന്നപ്പോഴാണ്​ മൃതദേഹം മാറിയ വിവരം അറിയുന്നത്​. അന്വേഷണത്തിൽ എത്തിയിരിക്കുന്നത്​ ശ്രീലങ്കൻ യുവതിയുടെ മൃതദേഹമാണെന്ന്​ വ്യക്​തമായി.[www.malabarflash.com] 
ഫെബ്രുവരി 27 സൗദിയിൽ ഹൃദയാഘാതം മൂലം നിര്യാതനായ ​കോന്നി കുമ്മണ്ണൂർ ഈട്ടിമൂട്ടിൽ റഫീഖി​​ന്റെ(28) മൃതദേഹമാണ്​ മാറിയത്​. ബുധനാഴ്​ച രാത്രി 10 മണിക്കാണ്​ മൃതദേഹം കുമ്മണ്ണൂരിലെ വസതിയിൽ കൊണ്ടുവന്നത്​. പെട്ടിയുടെ പുറത്ത്​ രേഖപ്പെടുത്തിയിരുന്ന മേൽവിലാസവും പാസ്​പോർട്ട്​ നമ്പരുമെല്ലാം റഫീഖിന്റെതായിരുന്നു. പെട്ടി തുറന്നപ്പോളാണ്​ യുവതിയുടേതാണെന്ന്​ മനസിലായത്​.

സൗദി എയർലൈൻ വിമാനത്തിൽ നെടുമ്പാശേരി വിമാനത്താവളത്തിലെത്തിയ മൃതദേഹം ബന്ധുക്കൾ ഏറ്റുവാങ്ങി വീട്ടിലെത്തിക്കുകയായിരുന്നു. മൃതദേഹം ശുചിയാക്കി എംബാം ചെയ്യുന്നതിനായി കൊണ്ടുപോകുമ്പോഴും കുഴപ്പമില്ലായിരുന്നുവെന്ന്​ ഗൾഫിൽ ഒപ്പമുണ്ടായിരുന്നവർ പറയുന്നു. എംബാം ചെയ്​ത്​ പെട്ടിയിലാക്കിയിടത്താണ്​ മാറ്റം സംഭവിച്ചതെന്നാണ്​ നിഗമനം.

കുമ്മണ്ണൂരിലെ വസതിയിലെത്തിയ പോലീസ്​ മൃതദേഹം കോട്ടയം മെഡിക്കൽ കോളേജിലേക്ക്​ മാറ്റി. അന്യരാജ്യക്കാരിയുടെ മൃതദേഹമായതിനാൽ അത്​ മടക്കികൊണ്ടുപോകുന്നതിന്​ നിയമതടസം ഏറെയാണെന്ന്​ പോലീസ്​ പറയുന്നു.