സ്ഥലത്തെത്തിയ കെ.എസ്.ഇ.ബി. മലപ്പുറം ലൈന് മെയിന്റനന്സ് സബ് ഡിവിഷന് എക്സിക്യൂട്ടീവ് എന്ജിനീയര് പി.എസ്.സജി ഡിവിഷന് കൗണ്സിലര്മാരും നാട്ടുകാരുടെ പ്രതിനിധികളുമായി ചര്ച്ച നടത്തിയതിനെത്തുടര്ന്നാണ് പണി പുനരാരംഭിക്കാനായത്.
നാട്ടുകാര് ഒപ്പ് ശേഖരണവും നിവേദനവും നല്കിയാല് കെ.എസ്.ഇ.ബി. ബോര്ഡ് തീരുമാനത്തിന്റെ അടിസ്ഥാനത്തില് തുടര്നടപടികള് സ്വീകരിക്കാമെന്ന ഉറപ്പാണ് അധികൃതര് നല്കിയത്. ലൈന് പൊട്ടിവീണ് തകര്ന്ന മേല്ക്കൂരകളുടെ അറ്റകുറ്റപ്പണികള്ക്ക് നഷ്ടപരിഹാരം അനുവദിക്കണമെന്നും നാട്ടുകാര് ആവശ്യപ്പെട്ടു. ചര്ച്ചയില് കൗണ്സിലര്മാരായ സി.ഷെറീന, സബിത കോടി, മുസ്ലിംലീഗ് ചെറുവണ്ണൂര്-നല്ലളം മേഖലാ പ്രസിഡന്റ് എം.കുഞ്ഞാമുട്ടി, അസി. എന്ജിനീയര് പി.അലി എന്നിവര് പങ്കെടുത്തു.
കഴിഞ്ഞ ബുധനാഴ്ചയാണ് കിഴുവനപാടം, തെക്കെപാടം മേഖലയില് കീഴ്ശ്ശേരി-ചേളാരി-നല്ലളം സബ്സ്റ്റേഷനുകളിലേക്കുള്ള 110 കെ.വി.ലൈനിന്റെ എര്ത്ത് കമ്പി പൊട്ടിവീണത്. അപകടത്തില് ഇരുപത്തിയഞ്ചോളം വീടുകളുടെ മേല്കൂരകള്ക്ക് നാശനഷ്ടം സംഭവിച്ചിരുന്നു. പൊട്ടിയദിവസം ലൈന് പുനഃസ്ഥാപിക്കാനുള്ള ശ്രമവും നാട്ടുകാര് തടഞ്ഞിരുന്നു.
ജനവാസ മേഖലയിലൂടെ വളരെ അപകടകരമായ രീതിയിലാണ് ലൈന് കടന്നുപോകുന്നതെന്ന് നാട്ടുകാര് പറഞ്ഞു. ലൈനുകള് കാലപ്പഴക്കമുള്ളവയും ടവറുകള് തമ്മിലുള്ള അധിക ദൂരവുമാണ് നാട്ടുകാരെ ഭീതിയിലാക്കുന്നത്. ദൂരപരിധി കൂടുതലുള്ള സ്ഥലങ്ങളില് അധിക ടവര് സ്ഥാപിച്ച് ലൈന് സുരക്ഷിതമാക്കണമെന്നാണ് നാട്ടുകാരുടെ ആവശ്യം. ഇതിനായി കെ.എസ്.ഇ.ബി. നേരത്തേ എസ്റ്റിമേറ്റ് തയ്യാറാക്കിയിരുന്നെങ്കിലും അനുമതി ലഭിക്കാതെ തടസ്സപ്പെട്ടുകിടക്കുകയാണ്.
No comments:
Post a Comment