മടവൂര് കെ.എസ്.ഇ.ബി. സബ്എന്ജിനീയര്, നഗരൂര് നെടുമ്പറമ്പ് എന്ജിനീയറിങ് കോളേജിന് സമീപം തൊടിയില് പുത്തന്വീട്ടില് ഷിബു (38) ആണ് മരിച്ചത്. ലൈന്മാന് രാജേന്ദ്രന്, കരാര് ജീവനക്കാരന് പോങ്ങനാട് ആലത്തുകാവ് സ്വദേശി കുട്ടന് എന്ന് വിളിക്കുന്ന ഗിരീഷ്കുമാര് (23) എന്നിവര്ക്കാണ് പണിക്കിടെ ഷോക്കേറ്റത്. തിങ്കളാഴ്ച വൈകീട്ട് 5 മണിയോടെയാണ് സംഭവം. പരിക്കേറ്റവരില് രാജേന്ദ്രന്റെ നില ഗുരുതരമാണ്.
തിങ്കളാഴ്ച ഉച്ചയ്ക്കുശേഷം സബ്എന്ജിനീയര് ഷിബുവിന്റെ നേതൃത്വത്തില് അഞ്ച് ജീവനക്കാരാണ് മടവൂര് മാവിന്മൂടിന് സമീപത്തുള്ള ട്രാന്സ്ഫോര്മറില് അറ്റകുറ്റപ്പണികള്ക്കെത്തിയത്. രാജേന്ദ്രനും ഗിരീഷുമാണ് ട്രാന്സ്ഫോര്മറില് കയറി പണി ചെയ്തിരുന്നത്. പണിക്കിടയില് ഇരുവര്ക്കും ഷോക്കേല്ക്കുകയായിരുന്നു. രണ്ട് ലൈന് ഉള്ളതില് ഒരു ലൈന് ഓഫാക്കാന് മറന്നുപോയതാണ് അപകടത്തിന് കാരണമെന്ന് പറയുന്നു.
ഷോക്കേറ്റ് താഴെവീണ ജീവനക്കാരെ കെ.എസ്.ഇ.ബിയുടെ ജീപ്പില് മെഡിക്കല്കോളേജ് ആസ്പത്രിയിലേക്ക് അയച്ച ഉടനെ ജോലിക്ക് കൊണ്ടുവന്ന പ്ലാസ്റ്റിക് കയറിന്റെ ഒരുഭാഗം മുറിച്ചെടുത്ത് തൊട്ടടുത്തുള്ള റബ്ബര് തോട്ടത്തിലെത്തി ഷിബു തൂങ്ങിമരിക്കുകയായിരുന്നു.
നേരത്തെ ജോലിചെയ്തിരുന്ന ഓഫീസിലും കൃത്യനിര്വഹണത്തിലെ പിഴവുമൂലം ഇതേ ഉദ്യോഗസ്ഥന് രണ്ട് മാസത്തോളം സസ്പെന്ഷനിലായിരുന്നു. ജോലിയില് വീണ്ടും പിഴവ് പറ്റിയതിലെ മനോവിഷമമാകാം ആത്മഹത്യയിലേക്ക് നയിച്ചതെന്ന് സുഹൃത്തുക്കള് പറയുന്നു. അടുത്തിടെയാണ് നഗരൂരിന് സമീപം ഷിബു പുതിയ വീട് പണികഴിപ്പിച്ചത്. ഭാര്യ: സ്വപ്ന. മക്കള്: ദേവനന്ദ, ദേവിനന്ദ.
No comments:
Post a Comment