ടി പി വധക്കേസിലെ മുഖ്യസാക്ഷിക്ക് വധഭീഷണി

തലശ്ശേരി : ടി പി ചന്ദ്രശേഖരന്‍ വധക്കേസില്‍ സി പി എം ഏരിയാസിക്രട്ടറിക്കെതിരെ കോടതിയില്‍ മൊഴി നല്‍കിയ സാക്ഷിക്ക് വധഭീഷണി. കായലോടിനടുത്ത പാച്ചപ്പൊയ്കയിലെ നിത്യാനന്ദനെതിരെയാണ് വധഭീഷണി മുഴക്കി ചുമരെഴുത്ത് പ്രത്യക്ഷപ്പെട്ടത്. കരിങ്കൊടിയും ഉയര്‍ത്തിയിട്ടുണ്ട്. വെളളിയാഴ്ച രാവിലെയാണ് പൊട്ടന്‍പാറയിലെ ഇന്ദിരാഭവന്റെ ചുമരില്‍ വധഭീഷണി മുഴക്കിയുള്ള ചുമരെഴുത്ത് പ്രത്യക്ഷപ്പെട്ടത്. നിത്യാനന്ദന്‍ നാട്ടില്‍ ആനന്ദന്‍ എന്ന പേരിലാണ് അറിയപ്പെടുന്നത്. ആനന്ദനെ.. നിനക്കൊരു താക്കീത് തന്നു, ഇത് ചുവന്ന ഗ്രാമം, നമുക്ക് കോടതിയിലല്ല, നാട്ടില്‍ തന്നെ കാണാം, സാക്ഷികള്‍ സൂക്ഷിക്കു, പെറ്റമ്മയെ ജീവനോടെ കാണണമെങ്കില്‍ ഓര്‍ക്കുക എന്നിങ്ങനെയാണ് ചുമരെഴുത്തിലുള്ളത്. നിത്യാനന്ദന്റെ പേര് കൂടാതെ നാട്ടിലെ കോണ്‍ഗ്രസ് പ്രവര്‍ത്തകരായ പ്രേംജിത്ത്, ഷൈജല്‍, ജിഷി, രജിലേഷ് എന്നിവരുടെ പേരും ചുമരെഴുത്തിലുണ്ട്. ജനലഴിയിലാണ് കരിങ്കൊടി ഉയര്‍ത്തിയത്.
ടി പി ചന്ദ്രശേഖരന്‍ വധക്കേസിലെ സാക്ഷിയാണ് നിത്യാനന്ദന്‍, മാറാട് പ്രത്യേക കോടതിയില്‍ നടന്ന വിചാരണയില്‍ സി പി എം കൂത്തുപറമ്പ് ഏരിയാസിക്രട്ടറി കെ ധനഞ്ജയന്‍, ഓഫീസ് സിക്രട്ടറി ബാബു എന്നിവര്‍ക്കെതിരെ നിത്യാനന്ദന്‍ മൊഴി നല്‍കിയിരുന്നു. കേസിലെ പ്രതികളായ കൊടി സുനിയും കിര്‍മാണി മനോജും സംഘവും സി പി എം കൂത്തുപറമ്പ് ഏരിയാകമ്മറ്റി ഓഫീസിലെത്തിയപ്പോള്‍ കെ ധനഞ്ജയനും ബാബുവും ചേര്‍ന്ന് പ്രതികളെ ഓഫീസിലേക്ക് കൂട്ടിക്കൊണ്ടുപോകുന്നത് കണ്ടുവെന്നായിരുന്നു സാക്ഷി മൊഴി. കേസില്‍ പ്രതിചേര്‍ക്കപ്പെട്ട നേതാക്കള്‍ക്കെതിരെയുള്ള സാക്ഷികള്‍ കൂട്ടത്തോടെ കൂറുമാറുന്നതിനിടയിലാണ് നിത്യാനന്ദന്‍ പ്രോസിക്യൂഷന്‍ അനുകൂലമായി മൊഴി നല്‍കിയത്.
സി പി എം പ്രവര്‍ത്തകനായിരുന്ന നിത്യാനന്ദന്‍ ഈ അടുത്തകാലത്താണ് സി പി എം വിട്ടത്. തുടര്‍ന്ന് നിത്യാനന്ദന് നേരെ വധശ്രമം നടന്നിരുന്നു. ഇരുകൈകളും കാലും തല്ലിയൊടിച്ച നിത്യാനന്ദന്‍ മാസങ്ങളോളം ചികിത്സയിലായിരുന്നു. സംഭവത്തില്‍ സി പി എം പ്രവര്‍ത്തകര്‍ക്കെതിരെ കേസെടുത്തിരുന്നു. കതിരൂര്‍ പോലീസ് സ്ഥലത്തെത്തി അന്വേഷണം നടത്തി.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News