നായ റോഡിലേക്ക് ചാടി: നിയന്ത്രണം വിട്ട ബൈക്ക് മറിഞ്ഞ് യുവാവ് മരിച്ചു

താമരശേരി: നായ റോഡിലേക്ക് ചാടിയതിനെ തുടര്‍ന്ന് നിയന്ത്രണംവിട്ട ബൈക്ക് മറിഞ്ഞ് യുവാവ് മരിച്ചു. പരപ്പന്‍പൊയില്‍ പരേതനായ പൊള്ളംപാറമ്മല്‍ ഹുസൈന്റെ മകന്‍ അബ്ദുള്‍ ഗഫൂര്‍ (33) ആണ് മരിച്ചത്. ദേശീയപാതയില്‍ താമരശേരിക്കടുത്ത് വട്ടക്കുണ്ട് വളവിനുസമീപം കഴിഞ്ഞ ദിവസം രാത്രി 8.30 ഓടെയാണ് അപകടം. ഗഫൂറിന്റെ വീടിനുസമീപം നടക്കുന്ന മതപ്രഭാഷണപരിപാടിക്കു പ്രഭാഷകനെ കൊണ്ടുവരാന്‍ പോയി തിരിച്ചുവരുമ്പോഴാണ് അപകടം.

ഓടിക്കൊണ്ടിരിക്കുന്ന ബൈക്കിന് മുന്നിലേക്ക് നായ ഓടിയതിനെതുടര്‍ന്ന് നിയന്ത്രണം വിട്ടബൈക്കില്‍ നിന്ന് റോഡില്‍ തലയടിച്ചുവീഴുകയായിരുന്നു. ഉടന്‍ നാട്ടുകാര്‍ കോഴിക്കോട് മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും വെളളിയാഴ്ച പുലര്‍ച്ചെ ഒരു മണിയോടെ മരിക്കുകയായിരുന്നു. പരപ്പന്‍ പൊയിലില്‍ ഓട്ടോഡ്രൈവറായിരുന്നു അബ്ദുള്‍ ഗഫൂര്‍. മാതാവ്: കദീജ, ഭാര്യ: കദീജ.

മക്കള്‍: മുഹമ്മദ് സിനാന്‍, മുഹമ്മദ് ഇദ്‌ലാന്‍, സഹോദരങ്ങള്‍: മന്‍സൂര്‍ (സൗദി അറേബ്യ), മഷ്ഹൂര്‍, മഹ്‌റൂഫ്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News