കാസര്കോട്: ജില്ലയില് കുടിവെളള ക്ഷാമം രൂക്ഷമായ സാഹചര്യത്തില് ടാങ്കര്ലോറികളില് വെളളമെത്തിക്കാന് ജില്ലാതല വരള്ച്ചാ ദുരിതാശ്വാസ സമിതി യോഗം തീരുമാനിച്ചു. യോഗത്തില് ജില്ലയുടെ ചുമതല വഹിക്കുന്ന കൃഷിവകുപ്പ് മന്ത്രി കെ.പി.മോഹനന് അദ്ധ്യക്ഷത വഹിച്ചു.
കുടിവെളളം എത്തിക്കേണ്ട പ്രദേശങ്ങളുടെ മുന്ഗണനാ ലിസ്റ്റ് തയ്യാറാക്കി തദ്ദേശഭരണ സ്ഥാപനങ്ങള് ജില്ലാകളക്ടര്ക്ക് സമര്പ്പിക്കണം. തനത് ഫണ്ട് ഉപയോഗിച്ച് വെളളം വിതരണം ചെയ്യാന് പഞ്ചായത്ത്-മുനിസിപ്പാലിറ്റികള്ക്ക് അനുമതി നല്കും. ആവശ്യപ്പെടുന്നവര്ക്ക് ജില്ലാതല വരള്ച്ചാ ദുരിതാശ്വാസ ഫണ്ടില് നിന്നും തുക അനുവദിക്കും. ദുരിതാശ്വാസ ഫണ്ടിന് 2.76 കോടി രൂപ സര്ക്കാര് അനുവദിച്ചിട്ടുണ്ട്. ഇതില് 2.65 കോടിയുടെ പദ്ധതികള്ക്ക് ഭരണാനുമതി നല്കിയിട്ടുണ്ട്.
കുഴല്കിണറുകള്,തുറന്നകിണറുകള്, മറ്റു ജലസ്രോതസ്സുകള് അടിയന്തിരമായി റിപ്പയര് ചെയ്യുന്ന പ്രവൃര്ത്തികള് ത്വരിതപ്പെടുത്താന് യോഗം നിര്ദ്ദേശിച്ചു. ജില്ലയിലെ വിവിധ പഞ്ചായത്ത്-മുനിസിപ്പാലിറ്റികളില് 537 കുഴല് കിണര് റിപ്പയര് ചെയ്യുന്ന പ്രവര്ത്തി ഭൂഗര്ഭജലവകുപ്പ് ഏറ്റെടുത്തിട്ടുണ്ടെന്ന് ബന്ധപ്പെട്ട ഉദ്യോഗസ്ഥര് അറിയിച്ചു. ഇവയില് 500 എണ്ണത്തില് ഹാന്റ് പമ്പ് ഘടിപ്പിക്കേണ്ടതുണ്ട്. റിപ്പയര് പ്രവര്ത്തികള് മൂന്ന് വ്യത്യസ്ത സ്ഥാപനങ്ങള്ക്കാണ് ടെണ്ടര് വിളിച്ചു നല്കിയിട്ടുളളത്. ഇതിനകം 40 കുഴല് കിണറുകളുടെ പ്രവൃത്തി പൂര്ത്തീകരിച്ചിട്ടുണ്ട്. കുഴല് കിണറുകളുടെ റിപ്പയര് എത്രയും പെട്ടെന്ന് തീര്ക്കേണ്ടതിനാല് ആവശ്യമായ വിദഗ്ദ്ധര് കാസര്കോട്ട് ലഭിക്കാത്ത സാഹചര്യത്തില് കര്ണ്ണാടകയില് നിന്നും ആള്ക്കാരെ കൊണ്ടുവന്ന് അടിയന്തിരമായി പ്രവൃത്തി പൂര്ത്തീകരിക്കണമെന്നും മന്ത്രി നിര്ദ്ദേശിച്ചു.
വരള്ച്ചാ ദുരിതാശ്വാസ പ്രവര്ത്തനങ്ങള്ക്ക് ഒരു നിയോജകമണ്ഡലത്തില് 65 ലക്ഷം രൂപാ മാത്രം ചെലവഴിക്കാന് പാടുളളുവെന്ന നിബന്ധന എടുത്തുകളയണമെന്ന് ജനപ്രതിനിധികള് മന്ത്രിയോട് അഭ്യര്ത്ഥിച്ചു.
എണ്മകജെ പഞ്ചായത്തിലെ കുടിവെളള പദ്ധതിയു#െട കുടിവെളള ചോര്ച്ച ഉടന് പരിഹരിക്കുമെന്ന് ഉദ്യോഗസ്ഥര് അറിയിച്ചു. മംഗല്പാടി കുടിവെളള പദ്ധതിയിലെ പ്രശ്നം പരിഹരിക്കും. പുതിയ പദ്ധതി നടപ്പാക്കിയതോടെ നേരത്തെ പ്രവര്ത്തിച്ചിരുന്ന മൂന്നു കുടിവെളള പദ്ധതി ഉപേക്ഷിച്ചത് പുനസ്ഥാപിക്കുന്നത് സംബന്ധിച്ച് ചര്ച്ച ചെയ്യാന് അടുത്ത ബുധനാഴ്ച മംഗല്പാടി പഞ്ചായത്തില് ബന്ധപ്പെട്ടവരുടെ യോഗം ചേരുന്നതാണ്. പൊട്ടിപൊളിഞ്ഞുപോയ കോളിയടുക്കം-ദേളി കുടിവെളള പദ്ധതിയുടെ പൈപ്പ് ലൈന് മാറ്റുന്ന പ്രവൃത്തി രണ്ടാഴ്ചയ്ക്കകം പൂര്ത്തീകരിക്കും. 104 കുടുംബങ്ങള്ക്കാണ് ഈ പൈപ്പ് ലൈനിലൂടെ വെളളമെത്തിച്ചുകൊണ്ടിരുന്നത്.
ഉദുമ പഞ്ചായത്തില് മത്സ്യഗ്രാമം പദ്ധതിയനുസരിച്ചു 1.30 കോടി രൂപാ ചെലവില് നടപ്പാക്കുന്ന കുടിവെളള പദ്ധതി ത്വരിതപ്പെടുത്തണമെന്ന് മന്ത്രിയോട് അഭ്യര്ത്ഥിച്ചു. പദ്ധതി കഴിഞ്ഞ വര്ഷം ഏറ്റെടുത്തിരുന്നുവെങ്കിലും വേണ്ടത്ര പുരോഗതി കൈവരിച്ചിട്ടില്ല. റോഡ് നിര്മ്മാണം മൂലം പൈപ്പ് പൊട്ടി മുടങ്ങിയിരുന്ന മാലോംകുടിവെളള പദ്ധതി പൂര്ത്തീകരിക്കണമെന്നും ആവശ്യം അവതരിപ്പിച്ചു. മഞ്ചേശ്വരം നിയോജകമണ്ഡലത്തിലെ 14 കോടി രൂപാ ചെലവില് നിര്മ്മിച്ച കുടിവെളള പദ്ധതിയില് ജല ശേഖരണത്തിനുളള നടപടി കൈക്കൊളളണം. നീലേശ്വരം താലൂക്കാശുപത്രിയില് ജലദൗര്ലഭ്യമൂലം ആഴ്ചയില് ഒരുദിവസം രോഗികളെ അഡ്മിറ്റ് ചെയ്യാതെ തിരിച്ചയ്ക്കുന്ന സ്ഥിതി ഉണ്ടെന്നും ഇതു പരിഹരിക്കാന് ജലവിതരണ പദ്ധതി വേണമെന്നും മന്ത്രിയോട് അഭ്യര്ത്ഥിച്ചു. കുടിവെളള പദ്ധതിയുടെ ഭാഗമായി ബാവിക്കരയില് റെഗുലേറ്ററിന്റെ 58 മീറ്റര് നീളത്തിലുളള നിര്മ്മാണം ഈ വര്ഷം പൂര്ത്തീകരിക്കും. ബാക്കിയുളള 61 മീറ്റര് നിര്മ്മാണം അടുത്ത വര്ഷം പൂര്ത്തീകരിക്കും. 2015 ജൂണ് മാസത്തിനുമുമ്പ് ഈ പദ്ധതി നടപ്പാക്കി ജനങ്ങള്ക്ക് കുടിവെളളം ലഭ്യമാക്കാന് കഴിയും. ഗ്രാമപഞ്ചായത്ത് പ്രസിഡണ്ടുമാരും,മുനിസിപ്പല് ചെയര്പേഴ്സണ്മാരും കുടിവെളള പ്രശ്നം പരിഹരിക്കുന്നതിനുളള നിര്ദ്ദേശങ്ങള് മന്ത്രിക്ക് സമര്പ്പിച്ചു.
യോഗത്തില് എംഎല്എമാരായ പി.ബി.അബ്ദുള് റസാഖ്,എന്.എ.നെല്ലിക്കുന്ന്,ഇ.ചന്ദ്രശേഖരന്,കെ.കുഞ്ഞിരാമന്(തൃക്കരിപ്പൂര്)ജില്ലാപഞ്ചായത്ത് പ്രസിഡണ്ട് പി.പി.ശ്യാമളാദേവി,ജില്ലാകളക്ടര് പി.എസ്.മുഹമ്മദ് സഗീര്,ജനപ്രതിനിധികള്,ഉദ്യോഗസ്ഥര് തുടങ്ങിയവര് പങ്കെടുത്തു.
Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Mapappuram News
No comments:
Post a Comment