ആവിപിടിക്കുന്ന ഉപകരണത്തില്‍നിന്ന് ഷോക്കേറ്റ് പത്തു വയസ്സുകാരി മരിച്ചു

പാറശ്ശാല: വീട്ടിനുള്ളില്‍വച്ച് ആവി പിടിക്കുന്ന ഉപകരണവുമായി കളിച്ചുകൊണ്ടിരുന്ന പത്തു വയസ്സുകാരി ഉപകരണത്തില്‍നിന്ന് ഷോക്കേറ്റ് മരിച്ചു. ഷോക്കേറ്റ കുട്ടിയുടെ കഴുത്തില്‍ ഉപകരണത്തിന്റെ ഒരു ഭാഗം കുത്തിക്കയറി രക്തം വാര്‍ന്നാണ് മരിച്ചത്.

പാറശ്ശാല മഹാദേവക്ഷേത്രത്തിലെ പൂജാരി പാറശ്ശാല ഗ്രാമത്തില്‍ ലക്ഷ്മിഭവനില്‍ താമസിക്കുന്ന രഘുനാഥിന്റെയും ലക്ഷ്മിയുടെയും മകള്‍ ഐശ്വര്യയാണ് മരിച്ചത്.

വ്യാഴാഴ്ച രാവിലെ 11.30 ഓടെയാണ് സംഭവം. ഐശ്വര്യയുടെ അമ്മ ലക്ഷ്മി വീടിന് പുറത്തു നില്‍ക്കുമ്പോഴായിരുന്നു ദുരന്തം. വീട്ടിനുള്ളിലെ പൂജാമുറിയില്‍ ആവി പിടിക്കുന്ന ഉപകരണം പ്രവര്‍ത്തനക്ഷമമാക്കിയാണ് കുട്ടി കളിച്ചുകൊണ്ടിരുന്നത്. ഇതിനിടയിലാണ് ഉപകരണത്തില്‍നിന്ന് ഷോക്കേറ്റത്.ഷോക്കേറ്റതിനിടെ ഉപകരണത്തിനുള്ളിലെ ഒരു ഭാഗം ഐശ്വര്യയുടെ കഴുത്തില്‍ കുത്തിക്കയറുകയായിരുന്നു. ഈ മുറിവില്‍ രക്തം വാര്‍ന്നാണ് കുട്ടി മരിച്ചത്.വീട്ടിനുള്ളില്‍നിന്ന് കുട്ടിയുടെ നിലവിളികേട്ട് അമ്മ ലക്ഷ്മി ഓടിയെത്തുമ്പോഴാണ് അപകടം കാണുന്നത്. ഉടന്‍തന്നെ തൊട്ടടുത്ത ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

പാറശ്ശാല ഭാരതീയവിദ്യാപീഠത്തിലെ അഞ്ചാംക്ലാസ് വിദ്യാര്‍ഥിനിയാണ് ഐശ്വര്യ. ആദിത്യകൃഷ്ണന്‍ സഹോദരനാണ്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News