യൂത്ത്‌ലീഗ് പ്രവര്‍ത്തകന്റെ മരണം: ഇടത് എം.എല്‍.എമാരെ തടഞ്ഞു

കൊടുവള്ളി: കൊടുവള്ളിയില്‍ പ്രതിപക്ഷ എം.എല്‍.എമാരെ ലീഗ് പ്രവര്‍ത്തകര്‍ തടഞ്ഞു. യൂത്ത്‌ലീഗ് പ്രവര്‍ത്തകന്‍ കരിറ്റിപ്പറമ്പ് പാണരുകണ്ടിയില്‍ അബൂബക്കര്‍ സിദ്ദീഖ് മരിച്ചതുമായി ബന്ധപ്പെട്ടു ശനിയാഴ്ച സി.പി.എം. ഓഫിസുകള്‍ വ്യാപകമായി തകര്‍ക്കപ്പെട്ടിരുന്നു.

കെ കെ ലതിക, പുരുഷന്‍ കടലുണ്ടി, കെ കുഞ്ഞമ്മദ്, അഡ്വ. പി ടി എ റഹീം, എ പ്രദീപ് കുമാര്‍, കെ ദാസന്‍ എന്നീ എം.എല്‍.എ മാരാണ് ഞായറാഴ്ച രാവിലെ 11ഓടെ കൊടുവളളിയിലെത്തിയത്. ഇവരെ 50ഓളം ലീഗ് പ്രവര്‍ത്തകര്‍ ദേശീയപാതയില്‍ ഓപണ്‍സ്റ്റേജിന് സമീപം തടയുകയായിരുന്നു. തുടര്‍ന്നു ദേശീയപാതയില്‍ ഏറെനേരം ഗതാഗതം തടസ്സപ്പെട്ടു.

പിന്നീട് പോലിസ് അകമ്പടിയോടെയാണു തകര്‍ന്ന സി.പി.എം. ലോക്കല്‍ കമ്മിറ്റി ഓഫിസ് എം.എല്‍.എമാര്‍ സന്ദര്‍ശിച്ചത്. കൊടുവള്ളിയിലെത്തിയ എം.എല്‍.എമാര്‍ക്ക് മതിയായ സുരക്ഷാക്രമീകരണങ്ങള്‍ ഒരുക്കിയില്ലെന്ന് ആരോപിച്ചു പോലിസും എം.എല്‍.എമാരുമായി വാക്കേറ്റമുണ്ടായി.

ലീഗ് പ്രവര്‍ത്തകര്‍ എം.എല്‍.എമാരോട് കയര്‍ത്തു സംസാരിക്കാന്‍ തുടങ്ങിയതോടെ സംഘര്‍ഷത്തിലേക്ക് എത്തുമെന്നു തോന്നിയെങ്കിലും പോലിസ് എം.എല്‍.എമാര്‍ക്ക് വലയം തീര്‍ക്കുകയായിരുന്നു. മാനിപുരം ഭാഗത്ത് തര്‍ക്കപ്പെട്ട ഓഫിസുകള്‍ സന്ദര്‍ശിക്കാനായി വാഹനത്തില്‍ കയറിയ എം.എല്‍.എമാരെ മാര്‍ക്കറ്റ് റോഡില്‍ വീണ്ടും തടയാനുള്ള ശ്രമംനടന്നു.

ലീഗ് പ്രവര്‍ത്തകരെ നീക്കംചെയ്താണ് എം.എല്‍.എമാരുടെ വാഹനത്തിനു പോകാനുള്ള സൗകര്യം ഒരുക്കിയത്.

അക്രമത്തില്‍ കേടുപാടു സംഭവിച്ച മുത്തമ്പലം, വാരിക്കുഴിത്താഴം, കൊളത്തക്കര, പൊയില്‍,കരൂഞ്ഞി, വാവാട് സെ ന്റര്‍, ആറങ്ങോട്, എരഞ്ഞിക്കോത്ത്, കളരാന്തിരി, നെല്ലാംങ്കണ്ടി എന്നിവിടങ്ങളിലെ ഓഫിസുകളും സ്ഥാപനങ്ങളുമെല്ലാം എം.എല്‍.എ മാര്‍ സന്ദര്‍ശിച്ചു. കൊടുവള്ളി സി.ഐ. സുനില്‍കുമാര്‍, താമരശ്ശേരി സി.ഐ. ബിജുരാജ് എന്നിവരുടെ നേതൃത്വത്തിലുള്ള പോലിസ് സംഘത്തിന്റെ ബന്തവസ്സിലാണ് സ്ഥലം സന്ദര്‍ശിച്ചത്.

Keywords: Kannur, Kasargod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News