'സക്കറിയായുടെ ഗര്‍ഭിണി'യില്‍ സനുഷ നായിക

തിരുവനന്തപുരം: പന്ത്രണ്ടാം ക്ലാസില്‍ പഠിക്കുമ്പോള്‍ ഗര്‍ഭിണിയായ പെണ്‍കുട്ടിയുടെ അനുഭവം പങ്കുവയ്ക്കുന്ന ചിത്രത്തില്‍ യുവനായിക സനൂഷ നായികയായി എത്തുന്നു. അനീഷ് അന്‍വര്‍ സംവിധാനം ചെയ്യുന്ന 'സക്കറിയായുടെ ഗര്‍ഭിണി'കള്‍ എന്ന ചിത്രത്തിലാണു സനൂഷ ഗര്‍ഭിണിയായി അഭിനയിച്ചത്.

ഞാന്‍ വളരെ എന്‍ജോയ് ചെയ്ത് അഭിനയിച്ച സിനിമയാണ് സക്കറിയായുടെ ഗര്‍ഭിണികള്‍. കുട്ടിക്കാലം മുതലേ ഗര്‍ഭാവസ്ഥയോട് ആദരവും ഇഷ്ടവും ഉണ്ടായിരുന്നു. ഗര്‍ഭിണികളെ ആകാംക്ഷയോടെയാണ് ഞാന്‍ നോക്കിയിരുന്നത്. കുട്ടികളെയും എനിക്കൊരുപാടിഷ്ടമാണ്. സക്കറിയായുടെ ഗര്‍ഭിണികളില്‍ അഭിനയിച്ചത് ഇതുവരെയുള്ള എന്റെ സിനിമാ അനുഭവങ്ങളില്‍ ഏറ്റവും മനോഹരമായിരുന്നു.

കൂടെയുള്ള റിമ കല്ലിങ്കലും, ഗീതയും, സാന്ദ്രാ തോമസുമെല്ലാം ഷൂട്ടിങ് ശരിക്കും ആസ്വദിച്ചു. ഞാന്‍ ഗര്‍ഭിണിയായി അഭിനയിച്ചപ്പോള്‍ എന്റെ അമ്മയ്ക്കായിരുന്നു നാണക്കേട്. ആ ദിവസങ്ങളില്‍ എന്റെ മുഖത്ത് ഗര്‍ഭിണികളുടെ മുഖത്തുണ്ടാവുന്ന ഭാവമാറ്റങ്ങളായിരുന്നു. യഥാര്‍ഥത്തില്‍ ഞാന്‍ ഗര്‍ഭിണിയായി അഭിനയിക്കുകയായിരുന്നില്ല. ആ അനുഭവം ജീവിക്കുകയായിരുന്നു- സനുഷ പറഞ്ഞതായി ചില വെബ്‌സൈറ്റുകള്‍ റിപ്പോര്‍ട്ട് ചെയ്യുന്നു.

കാസര്‍കോടുനിന്നും കൊച്ചിയില്‍ താമസത്തിനെത്തിയ ഫാത്തിമ എന്ന കഥാ പാത്രത്തെ റിമാ കല്ലിങ്കല്‍ അവതരിപ്പിക്കുന്നു. അന്‍പത്തഞ്ചു വയസുള്ള ഗര്‍ഭിണിയായി ഗീതയും മറ്റൊരു പ്രധാന വേഷത്തില്‍ എത്തുന്നു. ചിത്രത്തിന്റെ പ്രൊഡ്യൂസര്‍ കൂടിയായ സാന്ദ്ര തോമസ് പ്രധാന വേഷത്തിലെത്തുന്നു. ഡോക്ടറായി ലാലും ഡോക്ടറുടെ ഭാര്യയായി ആശാ ശരത്തും ശ്രദ്ധേയമായ വേഷങ്ങള്‍ അവതരിപ്പിക്കുന്നു. അജു വര്‍ഗീസ്, ഷാനവാസ്, ദേവി അജിത് എന്നിവര്‍ മറ്റ് അഭിനേതാക്കളാണ്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, Movie, Sanusha, Rima Kallingal, Geetha