സലാം ഹാജിയുടെ കൊല: എ.ഡി.ജി.പി വീട് സന്ദര്‍ശിച്ചു

തൃക്കരിപ്പൂര്‍: പ്രവാസി വ്യവസായിയും കെ.എം.സി.സി നേതാവുമായ വെള്ളാപ്പിലെ എ.ബി.അബ്ദുല്‍ സലാം ഹാജിയുടെ വസതി എ.ഡി.ജി.പി എസ്.ശങ്കര്‍ റെഡി സന്ദര്‍ശിച്ചു. ശനിയാഴ്ച വൈകിട്ട് വെള്ളാപ്പിലെ സഫാ മര്‍വയില്‍ എത്തിയ അദ്ദേഹം മുക്കാല്‍ മണിക്കൂറോളം വീടും പരിസരവും നടന്നു കണ്ടു.

പോലിസ് നായ മണം പിടിച്ച് ഓടിയ പാത അദ്ദേഹം പരിശോധിച്ചു. വീട്ടില്‍ സലാംഹാജി കൊല്ലപ്പെട്ട മുറി ഉള്‍പ്പടെയുള്ളവ എ.ഡി.ജി.പി.ടാബില്‍ പകര്‍ത്തുകയും ചെയ്തു. സലാം ഹാജിയുടെ മകന്‍ സുഫിയാനോടാണ് ശങ്കര്‍ റെഡി കാര്യങ്ങള്‍ തിരക്കിയത്. ഹാജിയുടെ മരുമകന്‍ ഇബ്രാഹിമും പോലിസ് ഉദ്യോഗസ്ഥരോടൊപ്പം ഉണ്ടായിരുന്നു.

കാസര്‍കോട് എസ്.പി തോംസണ്‍ ജോസഫ്, ഡി.വൈ.എസ്.പി.തമ്പാന്‍, സി.ഐ.സജീവന്‍ എനിവര്‍ എ.ഡി.ജി.പിയെ അനുഗമിച്ചു. ആഗസ്റ്റ് അഞ്ചിന് പുലര്‍ച്ചെയാണ് ദുബൈ വ്യവസായിയായ അബ്ദുല്‍ സലാം ഹാജി കവര്‍ച്ചാ സംഘത്തിന്റെ അക്രമത്തില്‍ കൊല്ലപ്പെട്ടത്.
കസേര കൊണ്ട് അടിച്ചിട്ട ശേഷം കൈകാലുകള്‍ കെട്ടി, വായും മൂക്കും ഉള്‍പ്പടെ ടേപ്പ് ഒട്ടിച്ചതിനെ തുടര്‍ന്ന് ശ്വാസം മുട്ടിയാണ് ഹാജി മരിച്ചത്. സംഭവം ആളുകളില്‍ ഭീതി വിതക്കുകയും കോളിളക്കമുണ്ടാക്കുകയും ചെയ്തിരുന്നു. സംഭവവുമായി ബന്ധപ്പെട്ട് അന്യ സംസ്ഥാന ബിസിനസുകാരനെ പിടികൂടിയിരുന്നു.

ഏതാനും ദിവസത്തിനകം നിര്‍ണായകമായ വിവരങ്ങള്‍ ലഭിക്കുമെന്നാണ് പോലീസിന്റെ പ്രത്യാശ. അതിനിടെ, കൊലപാതകം സംബന്ധിച്ച് ഒട്ടേറെ അഭ്യൂഹങ്ങള്‍ പ്രചരിക്കുന്നത് പോലീസിന്റെ ശ്രദ്ധയില്‍ പെട്ടിട്ടുണ്ട്. ഹാജിയുടെ അടുത്ത ബന്ധുക്കളെ പോലിസ് ചോദ്യം ചെയ്തു എന്നും മറ്റുമാണ് പ്രചാരണം. ഇക്കാര്യം നിഷേധിക്കാനോ സ്ഥിരീകരിക്കാനോ പോലിസ് തയാറല്ല.

Trikarpurnews

Keywords: Malappuram News, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News