യൂത്ത് കോണ്‍ഗ്രസ് നേതാവ് വെട്ടേററ് മരിച്ചു

തൃശൂര്‍: ഗ്രൂപ്പുപോരിന്റെ യും കൊലപാതകത്തിന്റെയും തുടര്‍ച്ചയായി വീണ്ടും കോണ്‍ഗ്രസ് നേതാവ് വെട്ടേറ്റു മരിച്ചു. അയ്യന്തോള്‍ കാഞ്ഞാണി റോഡില്‍ ലാലൂരിനു സമീപം കൊള്ളന്നൂര്‍ വീട്ടില്‍ ലാല്‍ജി(40)യാണു വെട്ടേറ്റുമരിച്ചത്. അയ്യന്തോള്‍ ഗ്രൗണ്ടിനു സമീപം കുന്നമ്പത്തു ലെയിനില്‍ പഞ്ചിക്കല്‍ ഇറക്കത്തുവച്ചാണു വെട്ടേറ്റത്. ഉടന്‍തന്നെ വെസ്റ്റ്‌ഫോര്‍ട്ട് ആശുപത്രിയിലെത്തിച്ചെങ്കിലും മരിച്ചു.

വെളളിയാഴ്ച രാത്രി ഏഴിനാണു സംഭവം. ആക്ടിവ സ്‌കൂട്ടറില്‍ തറവാട്ടുവീട്ടില്‍ പോയി മടങ്ങുന്നതിനിടെയായിരുന്നു വെട്ടേറ്റത്. കെപിസിസി ന്യൂനപക്ഷ സെല്‍ കണ്‍വീനറാണ്.

ഭാര്യ: ഷോബി. മക്കള്‍: അക്ഷയ്, അമല്‍. ബൈക്കിലെത്തിയ രണ്ടംഗ സംഘമാണു വെട്ടിയതെന്നു സൂചനയുണ്ട്. ബൈക്ക് സ്‌കൂട്ടറിലിടിച്ചു വീഴ്ത്തിയശേഷമാണ് ആക്രമണം നടത്തിയതെന്നു പറയുന്നു.

അസിസ്റ്റന്റ് പോലീസ് കമ്മീഷണര്‍ ചന്ദന്‍ ചൗധരിയുടെ നേതൃത്വത്തില്‍ പോലീസ് സ്ഥലത്തെത്തി അന്വേഷണം തുടങ്ങി. കഴിഞ്ഞ മേയ് 31നു കോണ്‍ഗ്രസ് എ-ഐ ഗ്രൂപ്പു പോരിന്റെ ഭാഗമായി അയ്യന്തോള്‍ മണ്ഡലം വൈസ് പ്രസിഡന്റായിരുന്ന ഈച്ചരത്ത് മധുവിനെ വെട്ടിക്കൊലപ്പെടുത്തിയിരുന്നു.

ഈ സംഭവത്തിലെ പ്രതിയായ പ്രേംജിലാലിന്റെ സഹോദരനാണ് വെളളിയാഴ്ച കൊല്ലപ്പെട്ട ലാല്‍ജി. മധുവിനെ കൊലപ്പെടുത്തിയതിന്റെ വൈരാഗ്യമാണ് ഈ കൊലപാതകത്തിനു പിന്നിലെന്നു പോലീസ് കരുതുന്നു. മധുവിനെ കൊലപ്പെടുത്തിയ കേസില്‍ നാലുപേരെ പോലീസ് അറസ്റ്റ് ചെയ്തിരുന്നു. സംഭവത്തിനു മണിക്കൂറുകള്‍ക്കുമുമ്പു ലാല്‍ജിയെ പടിഞ്ഞാറേകോട്ടയില്‍ കണ്ടവരുണ്ട്. 

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News