വിസാ ചട്ടം ലംഘിച്ച് അമൃതാനന്ദമയി മഠം സന്ദര്‍ശിച്ച പാകിസ്താന്‍ കുടുംബം അറസ്റ്റില്‍

കൊല്ലം: വിസാ ചട്ടം ലംഘിച്ച് അമൃതാനന്ദമയി മഠം സന്ദര്‍ശിച്ച പാകിസ്താന്‍ കുടുംബം അറസ്റ്റില്‍. അറസ്റ്റിലായ സംഘത്തെ കൊല്ലം സിറ്റി പോലിസ് വനിതാ സെല്ലില്‍ പാര്‍പ്പിച്ചു. ഇവരെ ഞായറാഴ്ച കരുനാഗപ്പള്ളി കോടതിയില്‍ ഹാജരാക്കും.

പാകിസ്താനിലെ സിന്ധ് പ്രവിശ്യയില്‍ ലെസ്ബല്ലാര്‍ സ്വദേശി കിഷോര്‍കുമാര്‍ (46), ഭാര്യ മഹാരാഷ്ട്ര താനെ സ്വദേശി സംഗീത കിഷോര്‍ (40), മക്കളായ നിജ, സിമ്രാന്‍, നിഖില്‍, സംഗീതയുടെ സഹോദരന്‍ താനെ സ്വദേശി സുമിത് (35) എന്നിവരെയാണ് പോലിസ് അറസ്റ്റ് ചെയ്തത്. വെള്ളിയാഴ്ച അമൃതാനന്ദമയി മഠത്തിലെത്തിയ സംഘം രാത്രിയില്‍ താമസത്തിനു മുറി അന്വേഷിച്ചു.

മഠം അധികൃതര്‍ നടത്തിയ അന്വേഷണത്തിലാണ് ഇവര്‍ പാകിസ്താന്‍ സ്വദേശികളാണെന്നു വ്യക്തമായത്. കരുനാഗപ്പള്ളി പോലിസില്‍ വിവരമറിയിച്ചതിനെത്തുടര്‍ന്ന് പോലിസ് വെള്ളിയാഴ്ച രാത്രി ഇവരെ മഠത്തില്‍ താമസിപ്പിച്ചു. തുടര്‍ന്ന് ശനിയാഴ്ച രാവിലെ സംഘത്തെ സിറ്റി പോലിസ് കമ്മീഷണര്‍ ഓഫിസില്‍ എത്തിച്ചു. പോലിസ് ചോദ്യം ചെയ്യലില്‍ ഇവര്‍ക്ക് താനെ വരെയുള്ള വിസയാണുണ്ടായിരുന്നത്.

കിഷോര്‍കുമാര്‍ സംഗീതയെ വിവാഹം കഴിച്ച ശേഷം അവര്‍ പാക് പൗരത്വം നേടിയിരുന്നു. ഇടയ്ക്കിടെ ഇന്ത്യ സന്ദര്‍ശിക്കുന്ന ഇവര്‍ അമൃതാനന്ദമയിയെ ഉത്തരേന്ത്യയില്‍ സന്ദര്‍ശിക്കാറുണ്ടായിരുന്നു. കിഷോറും കുടുംബവും അമേരിക്കയിലും അമൃതാനന്ദമയിയെ സന്ദര്‍ശിച്ചിരുന്നു. നിജയും സിമ്രാനും നിഖിലും സിന്ധ് പ്രവിശ്യാ തലസ്ഥാനമായ കറാച്ചിയിലാണ് പഠിക്കുന്നത്.

ഫോറിനേഴ്‌സ് രജിസ്റ്റര്‍ ആക്ട് പ്രകാരം ഇവര്‍ക്കെതിരെ പോലിസ് കേസെടുത്തു. കൂടാതെ പാസ്‌പോര്‍ട്ടും ഇവരുടെ പക്കലില്ലായിരുന്നു. താനെയില്‍ നിന്നു പുറപ്പെടും മുമ്പ് ഇവര്‍ ബന്ധപ്പെട്ട പോലിസിലും വിവരമറിയിച്ചിരുന്നില്ല.

Keywords: Malappuram News, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News