സലാംഹാജി വധം: പ്രതികളായ തൃശൂര്‍ സഹോദരങ്ങള്‍ ഉത്തര്‍പ്രദേശില്‍ പിടിയില്‍

തൃക്കരിപ്പൂര്‍: ഗള്‍ഫ് വ്യവസായി തൃക്കരിപ്പൂര്‍ വെള്ളാപ്പിലെ എ.ബി. അബ്ദുല്‍ സലാം ഹാജിയെ തലക്കടിച്ച് കൊലപ്പെടുത്തി വീട് കൊള്ളയടിച്ച കേസിലെ രണ്ട് പ്രതികള്‍ ഉത്തര്‍പ്രദേശിലെ അലഹബാദില്‍ പിടിയിലായി. തൃശൂര്‍ മേച്ചേരി സ്വദേശികളും സഹോദരങ്ങളുമായ മുഹമ്മദ് അസ്‌ക്കര്‍, മുഹമ്മദ് ശിഹാബ് എന്നിവരാണ് പിടിയിലായത്.

തൃശൂരിലും മലപ്പുറത്തും പ്രതികള്‍ക്ക് വീടുള്ളതായി അന്വേഷണ സംഘം നേരത്തേ തന്നെ കണ്ടെത്തിയിരുന്നു. പ്രതികള്‍ക്ക് യു.പിയുമായുള്ള ബന്ധവും അന്വേഷണസംഘം മനസിലാക്കിയിരുന്നു. ഇവര്‍ ക്വട്ടേഷന്‍ സംഘമാണെന്നാണ് സൂചന.

കേസിലെ മുഖ്യ പ്രതികളായ നീലേശ്വരം ആനച്ചാലിലെ ഇ.കെ. നൗഷാദ് (34), ഇ.കെ. മുഹമ്മദ് റമീസ് (30), പ്രതികള്‍ക്ക് കാര്‍ നല്‍കിയ നീലേശ്വരം തെരുവിലെ കല്ലായി ഹൗസിലെ എം. മുഹസീന്‍ (23) എന്നിവരെ നേരത്തെ അറസ്റ്റ് ചെയ്തിരുന്നു. ക്വട്ടേഷന്‍ സംഘത്തില്‍ പെട്ട ഏതാനുംപേരും കൂടി ഇനി അറസ്റ്റ് ചെയ്യാനുണ്ടെന്ന് അന്വേഷണ ഉദ്യോഗസ്ഥര്‍ പറഞ്ഞു.

കേരള പോലീസിന്റെ കണ്ണുവെട്ടിച്ചാണ് ഇവര്‍ യു.പി.യിലേക്ക് കടന്നത്. ഇരട്ട സഹോദരന്മാര്‍ പിടിയിലായതോടെ കേസില്‍ പിടിയിലായവരുടെ എണ്ണം അഞ്ചായി. നീലേശ്വരം സി.ഐ. സജീവന്റെ നേതൃത്വത്തിലുള്ള സംഘമാണ് പ്രതികള്‍ക്ക് വേണ്ടി വലവിരിച്ചത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News