ഓണത്തിന് ആവേശം പകരാന്‍ കണ്ണൂര്‍ നഗരത്തില്‍ പുലിയിറങ്ങി

കണ്ണൂര്‍ : ഓണത്തിന് ആവേശം പകരാന്‍ കണ്ണൂര്‍ നഗരത്തില്‍ പുലിയിറങ്ങി. ഡിടിപിസിയുടെ ഓണാഘോഷത്തിന്റെ ഭാഗമായാണ് പുലികള്‍ നിരത്തിലിറങ്ങിയത്. മധ്യകേരളത്തില്‍ മാത്രം കണ്ടുവരുന്ന പുലിക്കളി ഇതാദ്യമായാണ് കണ്ണൂരിലെത്തിയത്.

അല്‍പ്പസമയത്തിനകം നഗരത്തില്‍ പുലിയിറങ്ങുമെന്ന വാര്‍ത്ത കണ്ണൂരുകാരെ ആദ്യം ഒന്നമ്പരപ്പിച്ചു. അക്ഷമരായി കാത്തുനിന്നവര്‍ക്കിടയിലേക്ക് വാദ്യമേളങ്ങളുടെ അകമ്പടിയോടെ പുലികളെത്തിയപ്പോള്‍ ആകാംഷ ആഹ്ലാദത്തിന് വഴിമാറി.

കുടവയറില്‍ ചാലിച്ച പുലിമുഖങ്ങള്‍ താളത്തിനൊത്തിളകിയപ്പോള്‍ കണ്ടുനിന്നവര്‍ക്ക് വിസ്മയം. ചിലര്‍ ചുവടുകളുമായി ഒപ്പം കൂടി. തൃശ്ശൂരിന്റെ സ്വന്തമായ പുലിക്കളി ഇന്നു പ്രാദേശികഭേദമില്ലാതെ കണ്ണൂരിന് വീഥികളെയും ആഘോഷത്തിമിര്‍പ്പിലാക്കി. മഞ്ഞപ്പുലി, ചെനന്‍പുലി, കരിന്‍പുലി തുടങ്ങിയവ അക്ഷരാരത്ഥത്തില്‍ നഗരത്തെ പ്രകമ്പനം കൊള്ളിച്ചു.

തൃശ്ശൂരില്‍ നിന്നുള്ള പത്തോളം പുലികളാണ് പുലികളിയില്‍ പങ്കാളികളായത്. നഗരത്തില്‍ ഇറങ്ങിയ പുലികളെ ക്യാമറയിലാക്കാന്‍ പലരും തിരക്ക് കൂട്ടി. ഓണാഘോഷത്തിന്റെ ഭാഗമായി ജില്ലാ ലൈബ്രറി കൗണ്‍സിലുമായി സഹകരിച്ചാണ് ഡിടിപിസി ഇത്തരത്തില്‍ പരിപാടി ഒരുക്കിയത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News