പന്തെടുക്കാന്‍ ചെന്ന വിദ്യാര്‍ഥിയെ നായയെ വിട്ട് കടിപ്പിച്ചതായി പരാതി

തൃക്കരിപ്പൂര്‍: പന്തുകളിക്കുന്നതിനിടെ വിദ്യാര്‍ഥിയെ അയല്‍വീട്ടുകാര്‍ നായയെ അഴിച്ചുവിട്ടു കടിപ്പിച്ചു. നായയെ പിടിച്ചുകെട്ടാന്‍ വിദ്യാര്‍ഥി കേണപേക്ഷിച്ചെങ്കിലും രക്ഷ വേണമെങ്കില്‍ കിണറ്റില്‍ ചാടാന്‍ വീട്ടുകാര്‍ പറഞ്ഞു. മുഖമടിച്ചുവീണ വിദ്യാര്‍ഥിയുടെ താടിയെല്ല് തകരുകയും അഞ്ചു പല്ലുകള്‍ കൊഴിയുകയും ചെയ്തു. ഇതിനിടെ കാലില്‍ നായ കടിക്കുകയും ചെയ്തു. ബുധനാഴ്ച തൃക്കരിപ്പൂര്‍ തങ്കയം കക്കുന്നത്താണ് സംഭവം. പെയിന്റിങ് തൊഴിലാളി കെ സാദിഖലിയുടെ മകന്‍ ഡിഗ്രി വിദ്യാര്‍ഥിയായ സമീറി(18)നാണ് ദാരുണമായി പരിക്കേറ്റത്.

വീടിനടുത്ത ആള്‍ത്താമസമില്ലാത്ത പറമ്പില്‍ കൂട്ടുകാരൊന്നിച്ചു പന്ത് കളിക്കുകയായിരുന്നു. അയല്‍വീട്ടിലെ മതിലിനകത്തേക്കു തെറിച്ച പന്ത് എടുക്കാന്‍ ചെന്നപ്പോള്‍ വീട്ടുകാര്‍ നായയെ അഴിച്ചുവിടുകയായിരുന്നു.

നായ പിന്നാലെ ഓടിയപ്പോള്‍ രക്ഷ നേടാന്‍ സമീര്‍ കിണറിന്റെ ആള്‍മറയില്‍ കയറിനിന്നു. നായയെ പിടിക്കാന്‍ കരഞ്ഞ് അപേക്ഷിച്ചെങ്കിലും വേണമെങ്കില്‍ കിണറ്റില്‍ ചാടിക്കോ എന്നാണു വീട്ടുകാര്‍ പറഞ്ഞത്. അവിടെനിന്ന് ഇറങ്ങി ഓടിയപ്പോള്‍ നായ പിന്നാലെ കുതിച്ചെത്തി. ഇതിനിടെ സമീര്‍ മതിലില്‍ മുഖമടിച്ചുവീണു. താടിയെല്ല് തകരുകയും പല്ലുകള്‍ കൊഴിയുകയും ചെയ്തു. ഇതിനിടെയായിരുന്നു നായയുടെ കടിയേറ്റത്.

ഗുരുതരമായി പരിക്കേറ്റ സമീറിനെ മംഗലാപുരം മംഗള ആശുപത്രിയില്‍ ശസ്ത്രക്രിയക്കു വിധയനാക്കി. ചന്തേര പോലിസ് കേസെടുത്തു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News