ഓണപ്പറമ്പ് മദ്രസ തീവെപ്പ്: ഇ.കെ. വിഭാഗം സുന്നി പ്രവര്‍ത്തകരായ രണ്ടുപേര്‍ കസ്റ്റഡിയില്‍

തളിപ്പറമ്പ: കൊട്ടില ഓണപ്പറമ്പ് നൂറുല്‍ ഇസ്ലാം മദ്രസ തീവെച്ച് നശിപ്പിച്ചതുമായി ബന്ധപ്പെട്ട് ഇ.കെ. വിഭാഗം സുന്നി പ്രവര്‍ത്തകരായ രണ്ടുപേരെ പോലീസ് കസ്റ്റഡിയിലെടുത്തു. പ്രദേശവാസികളായ ഷക്കീര്‍, മുസ്തഫ എന്നിവരെയാണ് കസ്റ്റഡിയിലെടുത്തത്. അത്തീക്ക്, സുഹൈല്‍ എന്നീ രുണ്ടുപേര്‍ക്ക് കൂടി സംഭവവുമായി ബന്ധമുണ്ടെന്ന സൂചന പോലീസിന് ലഭിച്ചിട്ടുണ്ട് .

ഇ.കെ. വിഭാഗം സുന്നികളുടെ നേതൃത്വത്തിലുള്ള പള്ളിക്കമ്മിറ്റിയുടെ കീഴില്‍ പ്രവര്‍ത്തിക്കുന്നതാണ് മദ്രസ. കഴിഞ്ഞ 18നാണ് മദ്രസ തീവെച്ച് നശിപ്പിച്ചത്. മദ്രസയിലെ പൗരാണിക ഗ്രന്ഥങ്ങളും ഖുര്‍ആര്‍ പ്രതികളും ഉള്‍പ്പെടെ വിലപ്പെട്ട സാധനങ്ങളെല്ലാം കത്തി നശിച്ചിരുന്നു. എ.പി. വിഭാഗം സുന്നികളാണ് തീവെപ്പിന് പിറകിലെന്ന് ആരോപണം ഉയര്‍ന്നിരുന്നു. എന്നാല്‍ പോലീസ് നടത്തിയ ശാസ്ത്രീയമായ അന്വേഷണത്തിലാണ് സംഭവത്തിന് പിറകില്‍ ഇ.കെ. വിഭാഗം സുന്നിപ്രവര്‍ത്തകരായ ചിലര്‍ക്ക് ബന്ധമുണ്ടെന്ന് സൂചന ലഭിച്ചത്.

നേരത്തെ ഓണപ്പറമ്പില്‍ എ.പി. വിഭാഗം സുന്നികളുടെ സ്വലാമത്ത് സെന്റര്‍ അക്രമിക്കപ്പെട്ടിരുന്നു. ഈ സംഭവത്തെ തുടര്‍ന്ന് സംഘര്‍ഷം പടരാതിരിക്കാന്‍ ഇരു വിഭാഗം സുന്നി നേതാക്കളെയും സി.ഐയും ഡി.വൈ.എസ്.പിയും പലതവണ വിളിച്ചിരുത്തി ചര്‍ച്ച ചെയ്തിരുന്നു. അതിന് ശേഷം പിലാത്തറയില്‍ ഒരു പ്രമുഖന്റെ മധ്യസ്ഥതയിലും ചര്‍ച്ച നടന്നിരുന്നു. സമാധാനപരമായി പ്രശ്‌നം പരിഹരിക്കാന്‍ നടക്കുന്ന ശ്രമത്തില്‍ ചിലര്‍ അസംതൃപ്തരായിരുന്നു. ഇങ്ങനെ അസംതൃപ്തിയുള്ള ചിലരാണ് പ്രശ്‌നം ആളിക്കത്തിക്കുവാന്‍ വേണ്ടി മദ്രസയ്ക്ക് തീവെച്ചതെന്നാണ് പോലീസിന്റെ നിഗമനം.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, Madrasa, Police, Case