സമരക്കാരുടെമേല്‍ കെട്ടിടത്തിന്റെ പാരപ്പറ്റ് വീണു; ഏഴുപേര്‍ക്ക് പരിക്ക്

ചെറുപുഴ: കേബിള്‍ ടി.വി. ചാനല്‍ ഓഫീസിനുമുമ്പില്‍ സമരം നടത്തുകയായിരുന്ന കേബിള്‍ ടി.വി. ജീവനക്കാരുടെ ഇടയിലേക്ക് കെട്ടിടത്തിന്റെ പാരപ്പറ്റ് തകര്‍ന്നുവീണ് ഏഴുപേര്‍ക്ക് പരിക്കേറ്റു. വെള്ളിയാഴ്ച രാവിലെ 10 മണിയോടെയാണ് ചെറുപുഴ കാക്കയംചാലില്‍ പ്രവര്‍ത്തിക്കുന്ന സി.സി.നെറ്റ് കേബിള്‍ ടി.വി. ചാനല്‍ ഓഫീസ് കെട്ടിടത്തിന്റെ പാരപ്പറ്റ് തകര്‍ന്നുവീണത്.

കരാര്‍ തൊഴിലാളികളില്‍ ഒരാളെ പിരിച്ചുവിട്ടതില്‍ പ്രതിഷേധിച്ച് കേബിള്‍ എംപ്ലോയീസ് അസോസിയേഷന്‍ സമരം നടത്തുന്നതിനിടെയാണ് അപകടം. പെട്ടെന്നുണ്ടായ ശക്തമായ കാറ്റില്‍ അഞ്ചുമീറ്ററോളം നീളത്തില്‍ പാരപ്പറ്റും പാരപ്പറ്റില്‍ പിടിപ്പിച്ചിരുന്ന ഷീറ്റും പെട്ടെന്ന് തകര്‍ന്നുവീഴുകയായിരുന്നു.

ഗുരുതരമായി പരിക്കേറ്റ പ്രാപ്പൊയില്‍ സ്വദേശി മയില്‍ വളപ്പില്‍ സുനില്‍ (35), ഉമ്മറപ്പൊയില്‍ സ്വദേശി മഹേഷ് ഉമ്പ്രോന്‍ (29) എന്നിവരെ പരിയാരം മെഡിക്കല്‍ കോളേജിലും പ്രാപ്പൊയില്‍ സ്വദേശി മധു കരേള (38)യെ ചെറുപുഴ സഹകരണ ആസ്​പത്രിയിലും പ്രവേശിപ്പിച്ചു. ഇ.പി.സന്തോഷ് (40), ടി.ബാബു (36), ഷിജു കാങ്കോല്‍ (24), രാജേഷ് ഇടത്തട്ട എന്നിവര്‍ക്ക് പ്രഥമശുശ്രൂഷനല്കി. പരിക്കേറ്റവരെ സി.കൃഷ്ണന്‍ എം.എല്‍.എ., ചെറുപുഴ ഗ്രാമപ്പഞ്ചായത്ത് പ്രസിഡന്റ് റോഷി ജോസ് തുടങ്ങിയവര്‍ സന്ദര്‍ശിച്ചു.

ഒന്നരവര്‍ഷംമുമ്പ് ഈ കെട്ടിടത്തിന്റെ പാരപ്പറ്റിന്റെ പകുതിഭാഗം ഇടിഞ്ഞുവീണിരുന്നു. അപകടത്തില്‍ രണ്ടു ബൈക്കുകളും തകര്‍ന്നു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News.