കളഞ്ഞുകിട്ടിയ 71,000 രൂപ പോലീസ് സ്‌റ്റേഷനില്‍ ഏല്‍പിച്ച് വിദ്യാര്‍ത്ഥി സത്യസന്ധതകാട്ടി

ഉദുമ: റോഡരികില്‍ നിന്ന് കളഞ്ഞുകിട്ടിയ 71,000 രൂപ പോലീസ് സ്‌റ്റേഷനില്‍ ഏല്‍പിച്ച് വിദ്യാര്‍ത്ഥി സത്യസന്ധതകാട്ടി. പാലക്കുന്നിലെ കുഞ്ഞിക്കണ്ണന്റെ മകനും കണ്ണൂരില്‍ വിദ്യാര്‍ത്ഥിയുമായ സകീനല്‍ (20) ആണ് സത്യസന്ധത കാട്ടിയത്. പള്ളിക്കര മലാംകുന്ന് റോഡരികില്‍നിന്ന് വ്യാഴാഴ്ച വൈകിട്ട് 4.45 മണിയോടെയാണ് സകീനലിന് പ്ലാസ്റ്റിക്ക് കവറില്‍ പൊതിഞ്ഞിരുന്ന പണം കളഞ്ഞുകിട്ടിയത്. ഇത് ഉടന്‍ ബേക്കല്‍ സ്റ്റേഷനില്‍ ജി.ഡി. ചാര്‍ജിലുണ്ടായിരുന്ന കോണ്‍സ്റ്റബിള്‍ സുവര്‍ണനെ ഏല്‍പിക്കുകയായിരുന്നു.

പണം റിട്ട. തഹസില്‍ദാര്‍ വിദ്യാനഗറിലെ കൃഷ്ണന്റേതാണെന്ന് കണ്ടെത്തിയ പോലീസ് വെള്ളിയാഴ്ച രാവിലെ സ്‌റ്റേഷനില്‍വെച്ച് തുക കൈമാറുകയായിരുന്നു. എസ്.ഐ. രാജേഷിന്റെ സാന്നിധ്യത്തിലാണ്
പണം കൃഷ്ണനെ ഏല്‍പിച്ചത്. സകീനലിന്റെ സത്യസന്ധതയെ പോലീസുകാരും പണം നഷ്ടപെട്ട കൃഷ്ണനും നാട്ടുകാരും പ്രശംസിച്ചു.

വ്യാഴാഴ്ച കാറില്‍ സഞ്ചരിക്കുമ്പോഴാണ് കൃഷ്ണന്റെ പണം നഷ്ടപ്പെട്ടത്. കൂടെയുണ്ടായിരുന്ന കൊച്ചുകുട്ടി പണമടങ്ങിയ കവര്‍ കാറിന് പുറത്തേക്ക് ഇടുകയായിരുന്നു. വീട്ടിലെത്തിയപ്പോള്‍ പണം നഷ്ടപ്പെട്ടതറിഞ്ഞ കൃഷ്ണന്‍ കുട്ടിയോട് ചോദിച്ചപ്പോഴാണ് താനത് റോഡരികില്‍ കളഞ്ഞുവെന്ന് കുട്ടി അറിയിച്ചത്. തുടര്‍ന്ന് തിരച്ചില്‍ നടത്തിവരുന്നതിനിടെയാണ് പണം ബേക്കല്‍ പോലീസ് സ്‌റ്റേഷനില്‍ ലഭിച്ചകാര്യം അറിഞ്ഞത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, Police Station, Student, Sakinal