കാഞ്ഞങ്ങാട്ട് വിവിധ ഭാഗങ്ങളില്‍ ബസുകള്‍ക്കു നേരെയുണ്ടായ കല്ലേറില്‍ അഞ്ചുപേര്‍ക്ക് പരിക്കേറ്റു

കാഞ്ഞങ്ങാട് : കാഞ്ഞങ്ങാട്ട് വിവിധ ഭാഗങ്ങളില്‍ ഞായറാഴ്ച രാത്രി ബസുകള്‍ക്കു നേരെയുണ്ടായ കല്ലേറില്‍ അഞ്ചുപേര്‍ക്ക് പരിക്കേറ്റു. കല്ലേറില്‍ ഏഴു ബസുകളുടെ ഗ്ലാസുകള്‍ തകര്‍ന്നു. മൂലക്കണ്ടം, ചേറ്റുകുണ്ട്, ചെമ്മട്ടംവയല്‍, പൊള്ളക്കട, കല്യാണ്‍ റോഡ്, പുല്ലൂര്‍ എന്നീ ഭാഗങ്ങളിലാണ് കല്ലേറുണ്ടായത്. 

വയനാട്ടിലേക്ക് വിനോദ യാത്രക്ക് പോകുന്ന വിദ്യാര്‍ത്ഥികള്‍ സഞ്ചരിച്ച വാഹനത്തിന് നേരെയുണ്ടായ കല്ലേറില്‍ ഡ്രൈവറുടെ മൂന്നു പല്ലുകള്‍ കൊഴിഞ്ഞു. കുമ്പള ദേവീനഗറിലെ മനോജ്കുമാറിന്റെയാണ് പല്ലു കൊഴിഞ്ഞത്. ഇയാളെ മംഗലാപുരം ആശുപത്രിയില്‍ പ്രവേശിപ്പിച്ചു. വോര്‍ക്കാടി സെന്റ് ജോസഫ് എ യു പി സ്‌കൂളിലെ വിദ്യാര്‍ത്ഥികളുമായി വയനാട്ടിലേക്ക് വിനോദയാത്രയ്ക്ക് പുറപ്പെട്ടതായിരുന്നു വാഹനം. രാത്രി പത്തുമണിയോടെ കാഞ്ഞങ്ങാട് സൗത്തില്‍ എത്തിയപ്പോഴാണ് കല്ലേറുണ്ടായത്.

മൂലക്കണ്ടത്തുണ്ടായ കല്ലേറില്‍ കോഴിക്കോട് ഫാറൂഖിലെ ഹമീദ് (33), ബസ് ഡ്രൈവര്‍ ജാബിര്‍ (43), എന്നിവര്‍ക്ക് പരിക്കേറ്റു. ഇവരെ ജില്ലാശുപത്രിയില്‍ പ്രവേശിപ്പിച്ചു. ബസിന്റെ മുന്‍ഭാഗത്തെ ഗ്ലാസുകള്‍ പൂര്‍ണ്ണമായും തകര്‍ന്നു. ഇതുസംബന്ധിച്ച പരാതിയില്‍ അഞ്ചുപേര്‍ക്കെതിരെ ഹോസ്ദുര്‍ഗ് പോലീസ് കേസെടുത്തു. മറ്റു ഭാഗങ്ങളിലുണ്ടായ കല്ലേറില്‍ പരിക്കേറ്റ മൂന്നുപേരെ വിവിധ ആശുപത്രികളില്‍ പ്രവേശിപ്പിച്ചു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, Kanhangad, Stone Pelting