‘ഉത്തുംഗോല്ലാസ നാസ’ എന്ന ശ്ളോകത്തില്‍നിന്ന് ശ്രീകൃഷ്ണ സ്തുതിയായ ‘മരഗതമണിമയചേല’ എന്ന ശുദ്ധസാവേരി കൃതിയില്‍ കൃഷ്ണലീലകളും കുചേലസംഗമവും വിടര്‍ന്നു. തുടര്‍ന്ന് മാനസസഞ്ചരരേ എന്ന ജനപ്രിയ കീര്‍ത്തനത്തിന്‍െറ അഭിനയ ചാരുതയായിരുന്നു. വിഷ്ണുവിന്‍െറ അനന്തശയനം മുതലുള്ള അവതാര വൈവിധ്യം. തുടര്‍ന്നും അന്നമാചാര്യരുടെ പ്രശസ്തമായ ‘വിനറോ ഭാഗ്യമു’ എന്ന തെലുങ്ക് കീര്‍ത്തനം. ഇടക്ക് പുരന്തരദാസര്‍ കീര്‍ത്തനം. ഇതിലും കൃഷ്ണലീലകള്‍. ഇന്ത്യന്‍ ക്ളാസിക്കല്‍ നൃത്തകലയില്‍ ഏറ്റവും കൂടുതല്‍ ആവര്‍ത്തിക്കപ്പെടുന്ന ശ്രീകൃഷ്ണഭാവങ്ങളും അവതാര കഥാസന്ദര്‍ഭങ്ങളുംതന്നെയായിരുന്നു കുട്ടികള്‍ കൂടുതലായും അവതരിപ്പിച്ചതും. ശിവനടനവും പാലാഴിമഥനവും തുടങ്ങിയവയും നൃത്തഭാവത്തില്‍ പ്രതിഫലിച്ചു.
റെക്കോഡ് ചെയ്ത കീര്‍ത്തനങ്ങളുടെയും തില്ലാനയുടെയുമൊക്കെ അകമ്പടിയോടെയായതിനാല്‍ നിലവാരമുള്ള സംഗീതത്തിനും നട്ടുവാങ്കത്തിനും ജതിസ്വരങ്ങള്‍ക്കുമൊക്കെയാണ് കുട്ടികള്‍ താളചലനം തീര്‍ത്തത്. വീണയുടെയും വയലിന്‍െറയും സ്വരപ്രസ്ഥാരങ്ങളിലും താളാത്മക ചുവടുകള്‍. താളമാലികകള്‍ക്കൊത്ത് ചടുലനടനം നടത്തിയും കുച്ചിപ്പുടിയുടെ തനതായ ലയചലനത്തില്‍ അതിദ്രുതം കാലുകള്‍ ചലിപ്പിച്ചും കുട്ടികള്‍ ചിലപ്പോഴെങ്കിലും വിസ്മയം തീര്‍ത്തു. ട്രാഫിക് ബ്ളോക്കില്‍പെട്ട് പലര്‍ക്കും എത്തിപ്പെടാന്‍ കഴിയാഞ്ഞതോടെ ഒരു മണിക്കൂറിലേറെ വൈകിയാണ് മത്സരം തുടങ്ങിയത്.
(കടപ്പാട്: മാധ്യമം)
Keywords: Kerala News, National News, Gulf News, Health News, Educational News, MalabarFlash, Malabar Vartha, Malabar News, Malayalam News
No comments:
Post a Comment