വിമാനയാത്രയ്ക്കിടെ ഒന്നര വയസുള്ള കുട്ടി മരിച്ചു

അബുദാബി: വിദേശയാത്രയ്ക്കിടെ വിമാനത്തില്‍വച്ച് ഒന്നര വയസുള്ള പെണ്‍കുട്ടി മരിച്ചു. കോടാലി നൂലുവള്ളി മുണ്ടക്കല്‍ ബിനോയ്-അശ്വിനി ദമ്പതികളുടെ മകള്‍ ഋഷിപ്രിയയാണ് അമ്മയോടൊപ്പം യാത്രചെയ്യവേ വിമാനത്തില്‍വച്ചു മരിച്ചത്. തിങ്കളാഴ്ച രാവിലെയാണു കുട്ടിയുമായി അശ്വിനി ബഹ്‌റൈനിലുള്ള ഭര്‍ത്താവ് ബിനോയിയുടെ അടുത്തേക്കു പോയത്. സംഭവത്തെത്തുടര്‍ന്നു ഗള്‍ഫ് എയറിന്റെ വിമാനം അടിയന്തരമായി അബുദാബിയില്‍ ഇറക്കി.

കഴിഞ്ഞ പത്തു വര്‍ഷമായി ബഹ്‌റൈനില്‍ അക്കൗണ്ടന്റായി ജോലി ചെയ്യുകയാണു ബിനോയ്. അശ്വിനി പ്രസവത്തിനാണു നാട്ടിലെത്തിയത്. ആറു മാസം മുന്‍പു ബിനോയ് കുട്ടിയെ കാണാന്‍ നാട്ടില്‍ വന്നിരുന്നു. എറണാകുളത്തെ സ്വകാര്യ ആശുപത്രിയില്‍ ഹൃദയസംബന്ധമായ അസുഖത്തിനു ചികില്‍സ തേടിയിരുന്നു. ഋഷിപ്രിയയുടെ ആരോഗ്യനില തൃപ്തികരമാണെന്നും വിമാനത്തില്‍ സഞ്ചരിക്കാന്‍ കുഴപ്പമില്ലെന്നും ഡോക്ടര്‍മാര്‍ അറിയിച്ചതിനെത്തുടര്‍ന്നാണ് അശ്വിനി കുഞ്ഞുമായി വിദേശത്തേക്കു പോയതെന്നു ബന്ധുക്കള്‍ പറഞ്ഞു. ഋഷിപ്രിയയുടെ മൃതദേഹം നാട്ടിലെത്തിക്കാനുള്ള ശ്രമങ്ങള്‍ നടക്കുന്നു.

Keywords: Kerala, National News, Gulf News, Health News, Educational News, MalabarFlash, Malabar Vartha, Malabar News, Malayalam News