മരം പൊട്ടി വീണു; മരത്തിനടിയില്‍പ്പെട്ട ബൈക്ക് യാത്രക്കാരന്‍ രക്ഷപ്പെട്ടു

ചെറുവത്തൂര്‍: ദേശീയപാത മട്ടലായിയില്‍ മരം പൊട്ടി വീണ് മരത്തിനടിയല്‍പ്പെട്ട ബൈക്ക് യാത്രക്കാരന്‍ അദ്ഭുതകരമായി രക്ഷപ്പെട്ടു. ബൈക്ക് പൂര്‍ണമായും തകര്‍ന്നു. മരം പൊട്ടിവീണതിനെ തുടര്‍ന്നു ദേശീയപാതയില്‍ മുക്കാല്‍ മണിക്കൂറോളം ഗതാഗതം തടസ്സപ്പെട്ടു. റോഡിനു സമീപത്തു കൂടി കടന്നു പോകുന്ന വൈദ്യുത ലൈനിലും മരം വീണതിനാല്‍ വൈദ്യുതി ബന്ധം നിലച്ചു. ശനിയാഴ്ച രാത്രി ഏഴോടെയാണ് റോഡിനരികിലുള്ള പൂമരം റോഡിലേക്ക് പൊട്ടി വീണത്.

അപ്പോള്‍ റോഡില്‍ കൂടി കടന്നു പോവുകയായിരുന്ന ബൈക്കാണ് അപകടത്തില്‍പ്പെട്ടത്. ബൈക്ക് ഓടിച്ചിരുന്ന യുവാവ് ചെറിയ പരുക്കുകളോടെ രക്ഷപ്പെട്ടതായി സംഭവ സ്ഥലത്തുണ്ടായിരുന്നവര്‍ പറഞ്ഞു. തൃക്കരിപ്പൂരില്‍ നിന്നെത്തിയ അഗ്നിശമനസേന വിഭാഗവും ചന്തേര പൊലീസും നാട്ടുകാരും ചേര്‍ന്നു മരം മുറിച്ചു മാറ്റിയതിനെ തുടര്‍ന്ന് 7.45നു ഗതാഗതം പുനഃസ്ഥാപിച്ചു.

Keywords: Kerala, National News, Gulf News, Health News, Educational News, MalabarFlash, Malabar Vartha, Malabar News, Malayalam News