മൈലാട്ടിയില്‍ ലോറി മറിഞ്ഞ് ഡ്രൈവര്‍ മരിച്ചു

പെരിയ [www.malabarflash.com]: ദേശീയപാത മൈലാട്ടിയില്‍ ലോറി നിയന്ത്രണം വിട്ട് മറിഞ്ഞ് മഹാരാഷ്ട്ര സ്വദേശിയായ ഡ്രൈവര്‍ മരിച്ചു. ക്ലീനര്‍ക്ക് ഗുരുതരം. വെള്ളിയാഴ്ച പുലര്‍ച്ചെ ആറരയോടെയാണ് അപകടം. ലോറി ഡ്രൈവര്‍ മഹാരാഷ്ട്ര സത്താറ സ്വദേശിയാണ് മരിച്ചത്. എന്നാല്‍ പേര് വിവരം വ്യക്തമായിട്ടില്ല. ഗുരുതര പരിക്കേറ്റ ക്ലീനറെ കാസര്‍കോട് ജനറല്‍ ആശുപത്രിയിലെ തീവ്ര പരിചരണ വിഭാഗത്തില്‍ പ്രവേശിപ്പിച്ചു. മഹാരാഷ്ട്രയില്‍ നിന്നും കണ്ണൂര്‍ ഭാഗത്തേക്ക് ടയറുകളുമായി പോകുകയായിരുന്നു ലോറി.

അപകട വിവരമറിഞ്ഞ് സ്ഥലത്തെത്തിയ ഫയര്‍ഫോഴ്സും പോലീസും നാട്ടുകാരും ചേര്‍ന്നാണ് രക്ഷാപ്രവര്‍ത്തനം നടത്തിയത്. ലോറിക്കടിയില്‍ കുടുങ്ങിയ ഡ്രൈവറെ പുറത്തെടുത്ത് ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല. സ്ഥിരമായി വാഹനങ്ങള്‍ അപകടത്തില്‍പ്പെടുന്ന സ്ഥലത്താണ് വെള്ളിയാഴ്ച രാവിലെ ലോറി മറിഞ്ഞത്. ഇവിടെ അപകട സാധ്യതാ ബോര്‍ഡ് സ്ഥാപിക്കണമെന്ന് നേരത്തെ ആവശ്യം ഉയര്‍ന്നിരുന്നു. എന്നാല്‍ അപകടം പതിവായിട്ടും ഇതിനു അധികൃതര്‍ തയ്യാറാകാത്തത് പ്രതിഷേധത്തിനു ഇടയാക്കി.

Keywords: Kasaragod News, Kerala Vartha, Malabarflash, Malabar news, Malayalam News