18നു രാത്രി പതിനൊന്നരയോടെയാണു ചിന്നക്കട പായിക്കട റോഡിൽ ഇലക്ട്രോണിക്സ് ഷോപ് നടത്തുന്ന തങ്കശേരി തോട്ടയ്ക്കാട് ക്ഷേത്രത്തിനു സമീപം നിയോ കോട്ടേജിൽ റോയിയെ (47) ഒരു സംഘം തട്ടിക്കൊണ്ടുപോയത്. തിങ്കളാഴ്ച പുലർച്ചെ ഒരുമണിയോടെ നീണ്ടകരയിൽ നിന്നാണു പ്രതികളെ പിടികൂടിയതെന്നു സിറ്റി പോലീസ് കമ്മിഷണർ ഡോ.എ.ശ്രീനിവാസ് അറിയിച്ചു.
മുൻപു നഗരത്തിൽ ഇലക്ട്രിക്കൽ കട നടത്തിയിരുന്ന റോയിസ് ഖാനാണു മുഖ്യസൂത്രധാരൻ. റോയിയും സഹോദരനും ചിന്നക്കടയിൽ ഇലക്ട്രിക്കൽ മൊത്തവ്യാപാര സ്ഥാപനം നടത്തുകയാണ്. വ്യാപാരം മോശമായതിനെ തുടർന്ന് ഇതു പൂട്ടിപ്പോയിരുന്നു. ഇയാൾ പുതിയ കട തുടങ്ങാനിരിക്കുകയായിരുന്നു.
ഇവിടെത്തന്നെയായിരുന്നു റോയിസ്ഖാന്റെ കടയും. മുൻകൂട്ടി ആസൂത്രണം ചെയ്ത പദ്ധതി പ്രകാരമാണ് തട്ടിക്കൊണ്ടുപോയതെന്നും ബിസിനസ് കുടിപ്പകയാണു കാരണമെന്നും പോലീസ് പറഞ്ഞു. തൃശൂർ സ്വദേശിയായ റോയിയെ വിരട്ടി ഓടിക്കുകയായിരുന്നു ലക്ഷ്യമെന്നാണു പ്രതികളുടെ മൊഴി. എന്നാൽ പോലീസ് ഇതു പൂർണമായി വിശ്വസിച്ചിട്ടില്ല.
വ്യാഴം രാത്രി 11നു അടച്ച ശേഷം ബൈക്കിൽ വീട്ടിലേക്കു പോകുകയായിരുന്ന റോയിയെ അക്രമികൾ വഴിയിൽ തടയുകയും വാനിൽ കരുതിയിരുന്ന കമ്പിവടി കൊണ്ട് അടിക്കുകയും ചെയ്തു. പകച്ചുപോയ റോയിയെ സംഘം ബലം പ്രയോഗിച്ചു വാനിലേക്കു കയറ്റി. തുടർന്നു റോയിസ്ഖാന്റെ മാടൻനടയിലെ വാടകവീട്ടിലെത്തിച്ചു പ്രതികൾ റോയിയെ മർദിക്കുകയും ഭീഷണിപ്പെടുത്തുകയും ചെയ്തു.
റോയിയുടെ സഹോദരൻ റെജിയുടെ പരാതിയിലാണ് പോലീസ് കേസെടുത്തത്. പള്ളിത്തോട്ടത്ത് ഉപേക്ഷിച്ച നിലയിൽ കണ്ടെത്തിയ വാനും റോയിയുടെ ബുള്ളറ്റും പോലീസ് കസ്റ്റഡിയിൽ എടുക്കുകയും ചെയ്തു. സംഭവ ദിവസം മുതൽ പ്രതികൾക്കായി പോലീസ് തിരുവനന്തപുരം, ആലപ്പുഴ, എറണാകുളം ജില്ലകളിൽ തിരച്ചിൽ നടത്തിയിരുന്നു. തിങ്കളാഴ്ച പുലർച്ചെ നീണ്ടകരയിൽ നിന്നു പ്രതികൾ പോലീസിന്റെ പിടിയിലാവുകയായിരുന്നു. വാഹനത്തിൽ കടക്കാൻ ശ്രമിച്ച പ്രതികളെ പോലീസ് പിന്തുടർന്നു തടഞ്ഞു നിർത്തിയാണ് പിടികൂടിയത്.
എസിപി ജോർജ് കോശിയുടെ മേൽനോട്ടത്തിൽ വെസ്റ്റ് സിഐ വി.എസ്.ബിജു നേതൃത്വം നൽകിയ അന്വേഷണ സംഘത്തിൽ എസ്െഎ നിസാമുദ്ദീൻ, ഗ്രേഡ് എസ്ഐ സന്തോഷ്, സിപിഒമാരായ ഫിറോസ്, ഷാജി, ഷാഡോ ടീം എന്നിവരാണ് ഉണ്ടായിരുന്നത്.
No comments:
Post a Comment