സര്‍വകലാശാലാ കലോത്സവം: 120 ഇനങ്ങള്‍, 4000 പ്രതിഭകള്‍

കാഞ്ഞങ്ങാട്: 22 മുതല്‍ 26 വരെ കാഞ്ഞങ്ങാട് നിത്യാനന്ദ എന്‍ജിനിയറിങ് കോളേജില്‍ നടക്കുന്ന കണ്ണൂര്‍ സര്‍വകലാശാല യൂണിയന്‍ കലോത്സവത്തില്‍ അരങ്ങേറുന്നത് 120 ഇനങ്ങള്‍. ആറ് വേദികളിലായി 4000ത്തോളം കൗമാരപ്രതിഭകളാണ് മാറ്റുരക്കുകയെന്ന് കണ്‍വീനര്‍ ഷാലു മാത്യുവും രതീഷ് രാജുവും പത്രസമ്മേളനത്തില്‍ പറഞ്ഞു. 22, 23 തീയതികളില്‍ 14 വേദികളിലായി സ്‌റ്റേജിതര മത്സരങ്ങള്‍ നടക്കും. 63 ഇനങ്ങളിലായാണ് സ്‌റ്റേജിതര മത്സരങ്ങള്‍ നടക്കുക. 24 മുതല്‍ നൃത്തയിനങ്ങള്‍ തുടങ്ങും. നൃത്ത, സംഗീത, നാടക വിഭാഗങ്ങളിലായി 57 ഇന മത്സരങ്ങള്‍ അരങ്ങേറും. സ്‌റ്റേജിതര മത്സരം 22ന് ടി.പത്മനാഭനും അതിന്റെ സമാപനം 23ന് കെ.കുഞ്ഞിരാമന്‍ എം.എല്‍.എ. (ഉദുമ)യും ഉദ്ഘാടനം ചെയ്യും. 24ന് പി.കരുണാകരന്‍ എം.പി. സ്‌റ്റേജ് മത്സരങ്ങളും 26ന് അതിന്റെ സമാപനം കെ.കുഞ്ഞിരാമന്‍ എം.എല്‍.എ. (തൃക്കരിപ്പൂര്‍)യും ഉദ്ഘാടനം ചെയ്യും.