തിരഞ്ഞെടുപ്പുകാലത്ത് അറസ്റ്റുചെയ്യാന്‍ നീക്കം നടന്നു-കുഞ്ഞാലിക്കുട്ടി

തിരുവനന്തപുരം: കഴിഞ്ഞ നിയമസഭാ തിരഞ്ഞെടുപ്പുകാലത്ത് തന്നെ അറസ്റ്റ് ചെയ്യാന്‍ നീക്കമുണ്ടായിരുന്നുവെന്ന് വ്യവസായ മന്ത്രി പി.കെ. കുഞ്ഞാലിക്കുട്ടി വെളിപ്പെടുത്തി. ഐസ്‌ക്രീം അട്ടിമറിക്കേസില്‍ വി.എസ്. അവിഹിതമായി ഇടപെട്ടു. ഇതിന്റെ രേഖകളുണ്ട്. പരസ്യമായരഹസ്യമാണിതെന്നും കുഞ്ഞാലിക്കുട്ടി പറഞ്ഞു.
തന്നെ അറസ്റ്റുചെയ്ത് രാഷ്ട്രീയ നാടകം കളിക്കാനാണ് ശ്രമം നടന്നത്. ഐസ്‌ക്രീം അട്ടിമറി കേസ് തികച്ചും രാഷ്ട്രീയ ലക്ഷ്യത്തോടെയുള്ളതാണെന്നും കുഞ്ഞാലിക്കുട്ടി മാതൃഭൂമി ന്യൂസിന്റെ 'ചോദ്യം ഉത്തരം' പരിപാടിയില്‍ പറഞ്ഞു.
മികച്ച പ്രകടനം കാഴ്ചവെച്ചാല്‍ ഒരു ജനകീയ പ്രക്ഷോഭത്തിനും യു.ഡി.എഫ് സര്‍ക്കാരിനെ അട്ടിമറിക്കാനാകില്ല. യു.ഡി.എഫ്. സര്‍ക്കാര്‍ തങ്ങളുടെ ലക്ഷ്യം തീരുമാനിക്കണം. അതിലേക്കുള്ള മാര്‍ഗത്തെക്കുറിച്ച് വ്യക്തതയുണ്ടാകണം. വികസന നയത്തെ സ്വാധീനിക്കാന്‍ ദൂഷിതവലയങ്ങളെ അനുവദിക്കരുതെന്നും കുഞ്ഞാലിക്കുട്ടി പറഞ്ഞു.
എന്‍.എസ്.എസ്സിന്റെ വിയോജിപ്പുകള്‍ പരിഹരിക്കാന്‍ ചര്‍ച്ചകള്‍ ആവശ്യമാണ്. എന്‍.എസ്.എസ് യു.ഡി.എഫിനെതിരെ നിലപാടെടുക്കുമെന്ന് കരുതുന്നില്ല. മലബാര്‍ സിമന്റ്‌സിലെ ക്രമക്കേടുകള്‍ അവസാനിപ്പിക്കാന്‍ ഈ സര്‍ക്കാരിന് കഴിഞ്ഞിട്ടുണ്ടെന്നും കുഞ്ഞാലിക്കുട്ടി പറഞ്ഞു.