മികച്ച ഹെല്‍പ്പ് ഡെസ്‌ക് പുരസ്‌കാരം കരിച്ചേരി ഗവ.യു.പി.സ്‌കൂളിന്

പൊയിനാച്ചി: ബേക്കല്‍ ഉപജില്ലയിലെ 2012-13 വര്‍ഷത്തെ മികച്ച ഹെല്‍പ്പ് ഡെസ്‌ക് പുരസ്‌കാരം കരിച്ചേരി ഗവ.യു.പി.സ്‌കൂളിന്. ആദ്യമായാണ് എസ്.എസ്.എ. ഇത്തരമൊരു പുരസ്‌കാരം ഏര്‍പ്പെടുത്തിയത്. സ്‌കൂളിലെ ഹെല്‍പ്പ് ഡെസ്‌കിന്റെ നേതൃത്വത്തില്‍ കുട്ടികളുടെ വിവിധതരത്തിലുള്ള പ്രശ്‌നങ്ങള്‍ കണ്ടെത്താനും പരിഹരിക്കാനും കഴിഞ്ഞു. പരാതിപ്പെട്ടിയും സ്ഥാപിച്ചിട്ടുണ്ട്. ഇതിന് സ്‌കൂളിലെ പെണ്‍കുട്ടികളുടെ ക്ലബ്ബായ 'കൗമാരദീപിക'യുടെ പ്രവര്‍ത്തനം കൂടുതല്‍ പ്രചോദനമാകുന്നു. ഹെല്‍പ്പ് ഡെസ്‌കിന് പ്രത്യേക കൗണ്‍സലിങ് മുറിയും ഒരുക്കിയിട്ടുണ്ട്. പുരസ്‌കാരച്ചടങ്ങിന്റെ ഭാഗമായി വനിതാദിനത്തില്‍ സെമിനാറും കൗണ്‍സലിങ്ങും സംഘടിപ്പിച്ചു. പരിപാടി ഗ്രാമപ്പഞ്ചായത്തംഗം ടി.അപ്പക്കുഞ്ഞി ഉദ്ഘാടനംചെയ്തു. എം.പി.ടി.എ. പ്രസിഡന്റ്എ.ലതിക അധ്യക്ഷത വഹിച്ചു. എ.ഇ.ഒ. കെ.രവിവര്‍മന്‍, ബി.പി.ഒ. വസന്തകുമാര്‍, പി.ടി.എ. പ്രസിഡന്റ് എം.ഗോപാലന്‍, പി.സനിത, പി.ജനാര്‍ദനന്‍ എന്നിവര്‍ സംസാരിച്ചു. പ്രധാനാധ്യാപകന്‍ രാധാകൃഷ്ണന്‍ കാമലം സ്വാഗതവും കെ.എന്‍.പുഷ്പ നന്ദിയും പറഞ്ഞു. സെമിനാറില്‍ 100ഓളം അമ്മമാര്‍ പങ്കെടുത്തു. പെണ്‍കുട്ടികളുടെ ആരോഗ്യ പ്രശ്‌നങ്ങളെക്കുറിച്ച് കെ.വീണയും സ്ത്രീകളും നിയമസുരക്ഷയും എന്ന വിഷയത്തില്‍ അഡ്വ. പി.രമാദേവിയും പ്രബന്ധം അവതരിപ്പിച്ചു. ടി.പ്രഭാകരന്‍, എം.ദിനേശന്‍, ടി.മധുസൂദനന്‍, ടി.വത്സല, എ.വി.രവി, പി.സതീശന്‍ എന്നിവര്‍ നേതൃത്വംനല്കി.