നാദാപുരത്ത് എസ്എസ്എല്‍സി പരീക്ഷ കഴിഞ്ഞ് മടങ്ങിയ വിദ്യാര്‍ഥികള്‍ക്ക് മര്‍ദനം

നാദാപുരം: നാദാപുരത്ത് എസ്എസ്എല്‍സി പരീക്ഷ കഴിഞ്ഞ് മടങ്ങുകയായിരുന്ന വിദ്യാര്‍ഥികള്‍ക്ക് മര്‍ദനമേറ്റു. പേരോട് ഹയര്‍ സെക്കന്‍ഡറി സ്‌കൂളില്‍ നിന്നും പരീക്ഷ എവുതി തിരിച്ചു പോവുന്ന വിദ്യാര്‍ഥികള്‍ക്കാണ് ബുധനാഴ്ച വൈകുന്നേരം 4.30 ഓടെ പേരോട് ടൗണിനടുത്തുള്ള വഴിയില്‍ വച്ച് മര്‍ദനമേറ്റത്. മര്‍ദനത്തില്‍ പരിക്കേറ്റ നാദാപുരം ചാലപ്പുറം സ്വദേശി ചക്കരക്കണ്ടി വീട്ടില്‍ അനസ് (16), കല്ലാച്ചി സ്വദേശി പുത്തമ്പുരയില്‍ സഹല്‍ (16), കല്ലാച്ചിയിലെ നടുവത്ത് മീത്തല്‍ സല്‍മാന്‍ (15), നടുവത്ത് മീത്തല്‍ ഇമ്രാന്‍ (15) എന്നിവരെ നാദാപുരം ഗവണ്‍മെന്റ് ആശുപത്രിയില്‍ പ്രവേശിപ്പിച്ചു. പത്ത് പേരടങ്ങുന്ന സംഘമാണ് തങ്ങളെ മര്‍ദിച്ചതെന്ന് വിദ്യാര്‍ഥികള്‍ പോലീസിന് മൊഴി നല്കിയിട്ടുണ്ട്.
ഇതിന്റെ തുടര്‍ച്ചയായി പേരോട് അരിയേരി ഉഷയുടെ വീട്ടില്‍ അതിക്രമിച്ചു കയറിയ ഒരുസംഘം അക്രമം അഴിച്ചുവിട്ടു. ഉഷയുടെ മകനെ മര്‍ദിക്കുന്നത് കണ്ട് തടയാന്‍ ശ്രമിച്ച ഉഷയ്ക്കും മര്‍ദനമേറ്റു. ഇവരെ കൈയ്ക്ക് പരിക്കേറ്റ നിലയില്‍ നാദാപുരം ഗവണ്‍മെന്റ് ആശുപത്രിയില്‍ പ്രവേശിപ്പിച്ചു. തുടര്‍ന്ന് നാദാപുരം പോലീസ് ബാരക്കിന് സമീപം ബൈക്കിലെത്തിയ സംഘം ഓട്ടോ തടഞ്ഞു നിര്‍ത്തി ഡ്രൈവറെയും യാത്രക്കാരെയും അടിച്ചു പരിക്കേല്പിച്ചു. കെഎല്‍18ജി 4695 നമ്പര്‍ ഓട്ടോറിക്ഷയാണ് തടഞ്ഞു നിര്‍ത്തിയത്.
ഇയ്യങ്കോട് സ്വദേശികളായ രാജേഷ്, ജയേഷ്, സുശാന്ത് എന്നിവരെയാണ് ഇരുമ്പുദണ്ഡുകള്‍ കൊണ്ട് മര്‍ദനമേറ്റ നിലയില്‍ നാദാപുരം ഗവണ്‍മെന്റ് ആശുപത്രിയില്‍ ചികിത്സയിലുള്ളത്. ആവോലത്ത് സംഘം ചേര്‍ന്ന് നിലയുറപ്പിച്ചവരെ പിരിച്ചുവിടാന്‍ നാദാപുരം പോലീസ് ലാത്തിവീശി. സ്ഥലത്ത് നാദാപുരം സിഐ യുടെ നേതൃത്വത്തിലുള്ള പോലീസ് സംഘം ക്യാമ്പ് ചെയ്യുന്നുണ്ട്. അക്രമത്തിന്റെ കാരണം വ്യക്തമല്ലെന്ന് പോലീസ് പ­റഞ്ഞു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Mapappuram News,Nadapuram, Perod, Anas, Sahal, Imran, Usha